KRISTDAG NO LUKAS 2,1-14

Iutem Griechisken int siuerlänner Platt van Öerntrop bracht düör Siegfried Kessemeier.

In diän Dagen kam en Befiäl vamme Koiser Äogustus, me söll alle Luie imme Roike opschroiwen. Et was et oiste Mol, dat me düt in Syrien unner diäm Drosten Zyrinus mek. Un alle trocken loss, siek opschroiwen te loten, joider in soin Hoime. Äok Jäosoip gänk van der Stat Nazareth in Goliläa ropp no Judäa in Dovids Stat, dai Bethlehem hett, denn hai was iut Dovids Hiuse un Schlag. Hai gänk, ümme siek opschroiwen te loten met Mari, soiner Frugge, dai was in Huopenunge. Äs se owwer do wören, was et anner Toit, dat se kromen soll, un se krieg iärn oisten Suen, deh ne innen Pucken un laggte ne in ne Krüwwe, woil imme Wärtshiuse süss kenne Stoie för se üewer was.

Un in derselwen Giegend wören Schöper biuten oppem Felle un horren boi Nachte iäre Schope. Un do stont opoimol en Engel vamme Härn vüör ne un et Härns Lecht ümmestrohlere se, un se harren wahne Angest. De Engel owwer saggte ne: „Fröchtet uch nit. Koiket, iek brenge uch jo ne Niggemär, dai uch un alle Luie fräo maken sall: Vandage is uch in Dovids Stat de Hailand buorn, dat is Kristus de Här. Un düt sall uch woisen: Oi wäet en Kinneken finnen, dat is innen Pucken dohn un legget in ner Krüwwe.“

Un opoimol wören do boi diäm Engel näo viele annere Engel, dai lueweren Guott un raipen:

„Prois för Guott imme häogen Hiemel un op Äern Frien för de Mensken met guerem Hiärten.“

(Verbesserte Fassung der Erstveröffentlichung in der Zeitschrift „Westfalenspiegel“, Dortmund, Dezember 1965. Copyright 2000 bei Siegfried Kessemeier, Münster)